Диққат! Веб-сайт тест режимида ишламоқда

“Функционал кўпкураш” спорт турини ривожлантириш масалалари муҳокама этилди

Куни кеча Ўзбекистон Республикаси Миллий гвардияси Қўриқлаш бош бошқармасида, Функционал кўпкураш федерацияси раиси, Миллий гвардия қўмондони ўринбосари полковник Маъмуржон Ғаниев ҳузурида йиғилиш бўлиб ўтди. Унда федерация томонидан амалга оширилган ишлар атрофлича муҳокама этилди. Айтиш керакки, Юртимизда, оғир атлетика, бадиий гимнастика, енгил атлетика, сузиш, велоспорт ва бошқаларни ўз ичига олган “Функционал кўпкураш” спорт тури тобора оммалашмоқда.
Мамлакатимиз аҳолисининг, шунингдек, ҳуқуқни муҳофаза қилувчи органлар ходимлари, куч тузилмалар ҳарбий хизматчилари ўртасида мазкур йўналишда кўплаб мусобақалар ташкил этилиб, шахсий таркибнинг жисмоний тайёргарликлари, спортга бўлган эътибор ва иштиёқи оширилмоқда.
Йиғилишда, ўзида куч, ирода ва чидамлиликни талаб этадиган ушбу спорт турини янада ривожлантириш ҳамда ёшларни ушбу спортга қизиқтириш борасида қатор чора-тадбирларни олиб бориш зарурлиги таъкидланди.
"Функционал кўпкураш"ни янги босқичга олиб чиқиш, ҳудудларда янги тўгараклар очиш, малакали мураббийлар жалб этиш, республика ва халқаро мусобақаларни ташкил этиш, спортчилар учун муносиб шарт-шароитлар яратиш, моддий техник базасини янада мустаҳкамлаш борасида қилиниши зарур бўлган ишлар хусусида тўхталиб ўтилди.
Мазкур йўналишда алоқадор мутасадди вазирлик ва идоралар билан ҳамкорликда тегишли тадбирни ташкил этиш борасида йўл харитасини ишлаб чиқиш келишиб олинди.

Янгиликлар

21 Июн
2022

Befit Race-2022 халқаро марафони

19 июнь куни “Амирсой” тоғ курорти ҳудудида Befit Race-2022 тўсиқлар оша югуриш халқаро марафони бўлиб ўтди. Мусобақада Қозоғистон, Россия, Бирлашган Араб Амирликлари ва бошқа мамлакатлар, шунингдек, Миллий гвардия, Ички ишлар вазирлиги, Ўзбекистон Функционал кўпкураш федерацияси жамоалари иштирок этди. 30 дан ортиқ жамоалар 5 км масофага 14 та тўсиқлар оша ғолиблик учун курашди, ҳар бир жамоада 4 нафардан (уч эркак ва бир аёл) иштирок этди. Спортчилар ўзларининг эпчиллиги ва жамоавий меҳнати туфайли ностандарт шароитларда қийин тўсиқлардан тез ва аниқ ўтишди. Қизғин, аммо қизиқарли ўтган мусобақа натижасида Миллий гвардия жамоаси (Валентина Кибалникова, Муҳаммад Тўраев, Бахриддин Умаралиев ва Суннат Салимов) фахрли 1-ўринни эгаллади. Жамоа ишини пухта ташкил этгани ва тайёргарлиги учун мураббийимиз, Миллий гвардия Тошкент шаҳри бўйича бошқармаси ҳарбий хизматчиси Александра Котляровага ўз миннатдорчилигимизни билдирамиз. Сафдошларимизни ғалаба билан самимий муборакбод этиб, «Abu Dhabi Spartan World Championship» жаҳон чемпионатида янада муваффақият ва ғалаба тилаймиз!

21 Май
2022

ТАРБИЯЛАНУВЧИЛАР ЎЗ ЧАҚҚОНЛИКЛАРИ, ЭПЧИЛЛИГИ ВА ИРОДАСИНИ СИНОВДАН ЎТКАЗДИЛАР

Функционал кўпкураш федерацияси ва Миллий Гвардия томонидан ўтказилаётган навбатдаги беллашувларда 35 нафар йигит-қизлар ўз эпчилликларини синовдан ўтказишди. Республикамизда илк маротаба имконияти чекланган болалар орасида ташкил этилган мазкур баҳслар Пойтахтимизнинг Олмазор туманидаги 100 сонли мактаб интернати ўқувчилари орасида ўтказилди. Тарбияланувчилар функционал кўпкураш тўгарагида бир неча ойлардан буён шуғулланиб келишади. Бугун эса улар турли шартлар асосида ўз чаққонликларини исботладилар. Болалар имконияти чекланган бўлишига қарамай ҳакамлар кўмагида шартларни хатосиз бажаришга ҳаракат қилдилар. Шартлар икки ёш тоифасида, йигит ва қизлар учун алоҳида кўринишда бажарилди. Ушбу беллашувларда шартларни дастлаб, ўғил болалар бошлаб беришди. Улар, 1-машқлар жамланмасида, ўтириб-туриш ва югуриш машқларини, 2-машқлар жамланмасида эса капалакча машқи ва қутилар атрофида ҳаракатланиш каби қизиқарли шартларни бажардилар. Қизлар ҳам шартларни эпчиллик ва аниқликда бажаришга ҳаракат қилдилар.Муҳими, иштирокчилар доимий тарзда функционал кўпкураш тўгарагида ушбу машқларни бажариб келганликлари сабабли шартлар уларда унчалик мураккаблик туғдирмади. Катта шодиёна сифатида ўтган мусобақа ўқувчилар орасида ўзаро дўстлик алоқаларини мустаҳкамлашга хизмат қилади. Энг чаққон ва эпчил иштирокчилар орасидан ғолиб ва совриндорлар аниқланиб уларга, эсдалик совғалари топширилди. Шунингдек, қўшимча номинациялар бўйича ҳам иштирокчиларга ташкилотчилар томонидан рағбатлантириб совғалар улашилди. Келажакда Федерация ташаббуси билан бу каби мусобақалар мамлакатимиз бўйлаб ўтказилиши режалаштирилмоқда.

26 Мар
2022

АЛОҲИДА ЭҲТИЁЖЛИ БОЛАЛАР ЎРТАСИДА ФУНКЦИОНАЛ КЎПКУРАШ БЎЙИЧА МУСОБАҚА БЎЛИБ ЎТДИ

Функционал кўпкураш федерацияси ҳамда "Стереотипларни ўзгартирамиз - спорт барча учун" Downside sport Нотижорат ижтимоий ахборот лойиҳаси ҳамкорлиги, шунингдек Миллий гвардия кўмагида алоҳида эътиборга муҳтож (Даун синдромли) болалар учун мусобақалар ташкил этилди. Ўзида чаққонлик, эпчиллик ва тезкорликни талаб этувчи мазкур спорт турида болалар шартларни мустақил бажара олишмайди. Уларга махсус кўнгиллилардан иборат жамоа кўмакчи бўлишди. Иштирокчилар шартларни қувноқ эстафета тарзида бажардилар. 3-5, 7-14 ва 18 ёш тоифасида иштирок этган йигит-қизлар махсус тўсиқларни айланиб ўтиш, қутилар устидан сакраш, умбалоқ ошиш каби оддий спорт элементларини бажаришди. Республикамизнинг турли вилоятларидан келган 45 нафар болалар якка тартибда кўнгиллилар ва яқинлари кўмагида шартларни бажариб маррага етиб келишди. Функционал кўпкураш машқларини бажариш орқали бу болаларнинг жисмоний имкониятлари янада яхшиланади, таянч- ҳаракатланиш тизими меъёрида ривожланади. Уларда вазиятни олдиндан баҳолаш, тезкор ҳаракатланиш, бегона болалар билан дўстлашиш каби хислатлар шаклланиб, ижтимоий ҳаётга мослашиш имконияти пайдо бўлади. Қизғин беллашувлар якунида ғолиб ва совриндорлар номи аниқланиб уларга эсдалик совғалари топширилди.

Нажмите на кнопку ниже, чтобы прослушать текст Powered by GSpeech