Функционал кўпкураш федерацияси вакиллари пойтахтимизнинг Юнусобод туманидаги 5-сонли умумий ўрта таълим мактабига ташриф буюриб, 10 ва 11-синф ўқувчилари билан суҳбат қурдилар. Ёшларнинг спортнинг янги турига бўлган қизиқишини ошириш ҳамда функционал кўпкурашни оммалаштириш мақсадида ташкил этилган учрашувда, Федерация раиси ўринбосари Л.Раҳматуллаева ҳамда мураббийлар томонидан мазкур спорт тури ҳақида маълумотлар берилиб, уйғун ҳолда бажариладиган бир нечта машқлар кўрсатиб берилди.

Ундаги қўшма машқлар тана ва руҳни тарбиялаш, чидамлиликни ошириш ва кутилмаган юкларга мослашишда муҳим роль ўйнаши тушунтириб ўтилди.
Шунингдек, учрашув давомида, ўқувчиларга Функционал кўпкураш федерациясининг махсус белгиси туширилган футболкалар тарқатилиб, бир неча машқлар ёшлар билан биргаликда бажарилди.

Учрашув якунида ўқувчилар ўзларини қизиқтирган саволларига жавоб олиб, батафсил тушунча ва тавсияларга эга бўлдилар.