Жорий йилнинг 16 октябрь куни Тошкент вилоятининг Чирчиқ шаҳридаги ҳарбий полигонда, мамлакатимизда илк маротаба Функционал кўпкураш федерацияси, Миллий гвардия, Мудофаа ва Ички ишлар вазирликлари ҳамкорлигида, "UZBEK RACE" тўсиқларни енгиб ўтиш бўйича пойга мусобақаси бўлиб ўтди.

Тадбирда Миллий гвардия, Мудофаа ва Ички ишлар вазирликлари ҳарбий хизматчи ва ходимлари, Функционал кўпкураш федерацияси раҳбарияти ва мураббийлари, шунингдек, мамлакатимиздаги таниқли спортчилар, спорт клублари вакиллари ҳамда меҳрибонлик уйи тарбияланувчилари иштирок этишди.

Пойгада 16 та жамоа иштирок этиб, ҳар бир жамоада 4 нафардан, 2 нафар эркак ва 2 нафар қизлар ғолиблик учун беллашдилар. Мусобақанинг очилиш маросимида, Функционал кўпкураш федерацияси раиси М. Ғаниев сўзга чиқиб, бугунги кунда мазкур спорт турини ривожлантириш ва оммалаштириш борасида амалга оширилаётган ишлар хусусида тўхталиб ўтди, ҳамда барча қатнашувчиларга омад ёр бўлишини тилади.

Шундан сўнг қуръа ташланиб, қизғин баҳсларга старт берилди. Жамоавий ўйинда ҳар бир иштирокчиларнинг 24 та шартлар асосида, тўсиқлардан ўтиши мутахассислар томонидан баҳолаб борилди.
Томошабинларнинг қўллаб-қувватлаши эса, жамоаларга янада тетиклик ва кўтаринки кайфият бахш этди. Пойгада жисмонан бақувват ва руҳан тетик бўлган, жамоавий ҳамжиҳатликда ҳаракат қилган иштирокчилар, ностандарт шароитлардан, мураккаб тўсиқлардан ўтиб, ғолиблик сари ҳаракат қилдилар.

Қизғин ва муросасиз кечган пойга якунига кўра, ғолиб жамоаларга диплом, медаль ҳамда эсдалик совғалари топширилди. Шунингдек, 3- ўринни қўлга киритган “Ozone Nukus” жамоаси 4 000 000 сўм, 2 - ўринни қўлга киритган – “Befit One” жамоаси 6 000 000 сўм ҳамда фахрли 1- ўринни қўлга киритган - "Ozone қасоскорлар" жамоаси 8 000 000 сўм пул мукофоти билан тақдирландилар.