Ҳозирги кунда функционал кўпкураш спорт турини тарғиб этиш, жисмонан чиниққан спортчиларни аниқлаш, уларни нуфузли халқаро мусобақаларга тайёрлаш мақсадида турли мусобақалар ўтказилиб келинмоқда.

Хусусан, жорий йилнинг 30 октябрь куни Миллий гвардия Тошкент шаҳри бўйича бошқармаси тасарруфидаги бўлинмалар ўртасида спортнинг функционал кўпкураш тури бўйича мусобақа ўтказилди. Ғолиблик учун 5 та жамоа иштирок этиб, ҳар бир жамоада 4 нафардан, 3 нафар эркак ва 1 нафар аёл ҳарбий хизматчилар беллашдилар. Мусобақанинг очилиш маросимида Миллий гвардия Тошкент шаҳри бўйича бошқармаси бошлиғи ўринбосари полковник М.Мадумаров сўз чиқиб, бугунги кунда мазкур спорт турини ривожлантириш ва оммалаштириш борасида амалга оширилаётган ишлар хусусида тўхталиб ўтди ҳамда барча қатнашувчиларга омад ёр бўлишини тилади.

Шундан сўнг, қуръа ташланиб қизғин баҳсларга старт берилди. Жамоавий ўйинда ҳар бир иштирокчиларнинг 7 та шарт асосида тўсиқлардан ўтиши мутахассислар томонидан баҳолаб борилди. Якунда иштирокчилар диплом билан тақдирланди. Мусобақанинг мутлақ ғолиб жамоаси эса 3 ноябрь куни ўтказиладиган республика босқичига йўлланмани қўлга киритди.