Юртимизда янги кириб келган функционал кўпкураш спорт тури тобора оммалашиб, ривожланиб бормоқда. Эътиборлиси, мазкур спорт турига ёшларнинг ҳам қизиқиши, иштиёқи ортмоқда. Ҳозирда функционал кўпкураш спорт турини тарғиб этиш, жисмонан чиниққан спортчиларни аниқлаш, уларни нуфузли халқаро мусобақаларга тайёрлаш мақсадида, турли мусобақалар ўтказилиб келинмоқда. Жумладан, жорий йилнинг 2-3 октябрь кунлари Миллий гвардия “Динамо” спорт мажмуасида мамлакатимизда илк маротаба Функционал кўпкураш федерацияси, Миллий гвардия ҳамда Ички ишлар вазирлиги ҳамкорлигида, Функционал кўпкураш спорт тури бўйича Ўзбекистон чемпионати мусобақаси бўлиб ўтди.
Тадбирда Миллий гвардия қўмондонлиги, Ички ишлар вазирлиги, Функционал кўпкураш федерацияси раҳбарияти ва мураббийлари, шунингдек мамлакатимиздаги таниқли спортчилар, спорт клублари вакиллари ҳамда ОАВлари, блогерлар ва жамоатчилик иштирок этишди. Мусобақанинг очилиш маросимида федерация раиси М. Ғаниев, Функционал кўпкураш спорт тури Миллий гвардия қўмондони ташаббуси билан 2021 йилнинг апрел ойида ташкил этилганлиги, бугунги кунда мазкур спорт турини оммалаштириш борасида мамлакатимизда амалга оширилаётган чора-тадбирлар юзасидан сўз юритиб, барча иштирокчиларга омадлар тилади.
Шундан сўнг иштирокчиларни мусобақа шартлари билан таништириб беллашувларга старт берилди. Мусобақада 100 га яқин спортчилар, 21 ёшдан ошган ўғил ва қизлар якка тартибда беллашдилар. Баҳсларда қизлар 63 кг ва ундан ортиқ, эркаклар 85 кг ва ундан ортиқ вазн тоифасида, 4 босқичда, қоп билан ишлаш, тошни силтаб кўтариш, тортиниш, штанга кўтариш, югуриш каби 10 дан ортиқ, беллашув шартлари ва элементларини бажардилар. 2 кун давом этган қизғин беллашувларда иштирокчиларнинг, чидамлилиги, кучи, тезлиги ва бошқа турли жисмоний сифатлари намоён бўлди.
Мусобақа натижаларига кўра, ҳар бир вазн тоифасида аниқланган ғолибларга, Ўзбекистон Республикаси Президенти Администрацияси ходими М.Эргашев, федерация раиси М.Ғаниев, Ички ишлар вазири ўринбосари полковник Б. Абдуллаев, профессионал боксчи Осиё чемпиони И. Мадримов ҳамда федерация раиси ўринбосари Л.Рахматуллаевалар томонидан медаль, диплом ва қимматбаҳо совғалари топширилди.
